ᐅᕙᓃᑦᑐᑎᑦ : ᐊᖏᕐᕋᖅ » ᐃᓄᓪᓗᐊᐱᒃ
ᐃᓄᓪᓗᐊᐱᒃ
ᖃᐅᔨᒪᔭᐅᖃᓯᐅᑎᒻᒥᔪᖅᑕᐅᖅ ᖃᓪᓗᓈᓄᑦ ᐄᓅᓘᐊᐱᒃ (Eenoolooapik) ᐊᒻᒪᓗ ᐹᐱ (Bobbie)
ᐃᓄᓪᓗᐊᐱᒃ ᐃᓅᓂᑯ 1820–ᖏᓐᓂ ᕿᒻᒥᖅᓲᒥ ᐸᓐᓂᖅᑑᑉ ᑲᖏᖅᓱᐊᓗᐊᓂ. ᓱᕈᓯᐅᓪᓗᓂ, ᐃᓚᒌᑦ ᓄᑦᑎᖅᑐᒥᓃᑦ ᐅᒥᐊᒃᑯᑦ ᐸᓐᓂᖅᑑᑉ ᑲᖏᖅᓱᐊᓗᐊᓄᑦ ᕿᑭᖅᑖᕐᔪᒻᒧᑦ, ᑕᐅᖅᓰᖃᑎᖃᖃᑦᑕᕈᒪᒧᑦ ᓯᒃᑳᑦᓯᑦ ᐊᕐᕕᓂᐊᖅᑎᖏᓐᓂᒃ, ᑖᒃᑯᐊ ᖃᐅᔨᒪᓐᓂᖏᑦᑐᑦ ᐸᓐᓂᖅᑑᑉ ᑲᖏᖅᓱᐊᓗᐊ ᓇᒦᒃᑲᓗᐊᕐᒪᖔᖅ. 1839–ᖑᑎᓪᓗᒍ, ᐃᓄᓪᓗᐊᐱᒃ ᐸᓐᓂᖅᑑᑉ ᑲᖏᖅᓱᐊᓗᐊ ᓇᓗᓇᐃᔭᖅᓯᒪᑦᓯᐊᖅᓱᒍ ᓄᓇᙳᐊᓕᐅᕈᔾᔨᔪᒥᓂᖅ ᑳᐱᑕᐃ ᐅᐃᓕᐊᒻ ᐱᐊᓂᒥᒃ, ᐊᖏᖃᑎᒌᓐᓂᖅᓱᒍᓗ ᓯᑳᓚᓕᐊᓕᖅᐸᑦ ᐃᓚᐅᕕᒋᒐᔭᕆᐊᖓ.
ᐃᓄᓪᓗᐊᐱᒃ ᐃᒃᐱᓇᖅᑐᓂᒃ ᑕᕝᕙᐅᕗᑏᕈᑎᓕᒥᓂᖅ ᐃᓚᒥᓂᒃ ᐃᖏᕐᕋᖃᑕᐅᓕᕐᓂᖅᓱᓂ ᑎᖏᕐᕋᐅᑕᓕᒃᑯᑦ ᐃᐳᑦᓱᑎᒃ ᐊᐳᑏᓐᒧᑦ (Aberdeen), ᑕᕝᕙᓃᑦᑎᓪᓗᒍ ᑕᑯᓐᓇᖅᑕᐅᓗᐊᖃᑦᑕᖅᑐᒥᓂᖅ. ᑎᑭᓯᒪᖅᓴᑐᐃᓐᓇᓕᖅᑎᓪᓗᒍ, ᓂᕆᔭᖅᑐᖅᓯᒪᖃᑎᒥᓂᖅ ᐹᑎᖅᑐᓂ. ᐃᓚᐅᕕᒋᓯᒪᔭᖏᑦ ᐋᖅᑭᑦᓱᐃᒪᕙᒌᖅᑐᒥᓃᑦ ᓂᕆᓂᐅᓚᖓᔪᒥᒃ ᐃᓄᓪᓗᐊᐱᒃ ᐊᔪᕆᒍᓐᓇᖅᓯᖏᓐᓂᖓᓂ ᐴᑎᓯᒥᐅᑕᐅᑦ ᐱᖅᑯᓯᖓᓂᒃ, ᓂᕆᐅᒋᔭᖃᖅᓱᑎᒃ ᑕᑯᓐᓈᕐᓂᐊᕆᐊᖅ ᓂᕆᑎᓪᓗᒍ ᓂᕆᔾᔪᓯᒥᓂᒃ. ᐃᓄᓪᓗᐊᐱᐅᑉ ᓂᕆᐅᙱᓈᖅᑯᔾᔭᒥᓂᖏᑦ ᕿᒥᕐᕈᓪᓗᓂᒋᑦ ᐊᓯᓂ ᖃᐃᖅᑯᔭᐅᓯᒪᖃᑎᓂ ᑕᐃᒫᓪᓗᐊᕐᓗ ᐊᐅᓚᓯᔭᐃᑦᓱᓂ ᐊᔪᕆᓪᓗᓂᒋᑦ ᖃᐅᔨᔭᐅᙱᑦᑐᖅ ᓇᐅᒧᑦ ᓂᕆᓚᐅᖅᓯᒪᙱᒋᐊᖓ ᐴᑎᓯᒃᑯᑦ ᓵᖏᓐᓂ ᐃᓅᓯᓕᒫᒥᓂ.
ᑕᑯᒍᒃ : ᐊᓕᒃᓵᓐᑐ ᒪᒃᑖᓄᑦ, ᑎᑎᖅᑐᒐᖅ ᐅᒥᐊᖅᑐᖃᑦᑕᕐᓂᒥᓂᖓᓂᒃ ᐃᓄᓪᓗᐊᐱᐅᑉ, ᐃᓅᓱᑦᑐᖅ ᐃᓄᒃ ᒪᑉᐱᒐᖅ..., 21.
ᓯᑳᓚᒦᓐᓂᕐᒥᓂ, ᐃᓄᓪᓗᐊᐱᒃ ᐃᓕᑦᑐᒥᓂᖅ ᖃᓕᐅᔭᖅᐸᐃᑎᑐᑦ ᑎᑎᖅᑲᓂᒃ, ᖁᑭᐅᑎᑖᖅᑎᑕᒥᓂᐅᓪᓗᓂᓗ ᐃᓕᓐᓂᐊᖅᑎᑕᐅᑦᓱᓂᓗ ᖃᓄᖅ ᖁᑭᕆᐊᕆᐊᖅ. ᑕᑯᒋᐅᑕᓕᒫᒥᓂᒃ ᑲᒪᒋᔭᓕᒥᓂᖅ, ᑭᓯᐊᓂ ᑐᙵᓇᐃᓐᓇᖅᑐᒥᓂᖅ ᐅᐃᒪᔮᕋᓂᓗ, ᓱᓇᑐᐃᓐᓇᐃᑦ ᑕᑯᒋᐅᕐᓇᖅᑐᑦ ᐋᓪᓚᐅᒋᔪᒃᓴᐅᒐᓗᐊᖅᓱᓂᒋᑦ. ᑲᔾᔮᕆᔭᓕᒥᓂᖅ ᐃᓪᓗᑕᖃᐅᙱᑦᑐᓂᒃ ᓄᓇᓂᒃ ᓇᐹᖅᑐᖏᓐᓂᓪᓗ, ᑭᓯᐊᓂᑦᑕᐅᖅ ᐊᔪᒐᐃᒃᓴᖅᑐᒥᓂᖅ ᐃᓄᐃᑦ ᐃᓅᓇᓱᐊᕈᓐᓇᕆᐊᖏᓐᓂᒃ ᐅᖓᓯᒃᓴᖅᑐᐊᓘᑦᓱᑎᒃ ᐊᓐᓇᐅᒪᓇᖅᑐᓂᒃ ᓂᕿᑦᓴᓂᒃ ᐃᒪᕐᒥᐅᑕᓂᒃ. ᑕᑯᒐᒥ ᕿᒧᑦᓯᐅᑎᐅᑉ ᓄᕐᕋᖓᓂᒃ ᐃᒻᒧᑦᓯᐅᒐᕐᒥᓪᓗ, ᐃᓱᒪᒋᔭᒥᓂᖏᒃ ᑐᒃᑐᓄᑦ ᐃᓚᑦᓴᔭᐅᒋᐊᖏᓐᓂᒃ, ᐊᐱᕆᔪᒥᓂᐅᓪᓗᓂᓗ ᐊᙳᑕᕆᔪᓐᓇᕐᒪᖔᕐᒥᒋᒃ. ᐅᖃᐅᔾᔭᐅᒐᒥ ᖃᓪᓗᓈᑦ ᑕᒪᒃᑯᓇᙵᑦ ᐆᒪᔪᓂᒃ ᐊᖑᓇᓱᐊᓲᖑᙱᒋᐊᖏᓐᓂᒃ, ᐃᓱᒪᒋᓯᑦᓴᐅᑎᒋᔭᒥᓂᖏᑦ ᖃᓪᓗᓈᓄᑦ ᕿᒻᒥᕆᔭᐅᒋᐊᖏᓐᓂᒃ.
ᐃᓄᓪᓗᐊᐱᐅᑉ ᓯᑳᓚᓐᓕᐊᕈᓯᒥᓂᖓ ᐱᔭᕆᐊᑭᑦᑑᓐᓂᖏᑦᑐᖅ. ᖁᐃᖅᑐᖃᑦᑕᓕᖅᑐᒥᓂᖅ ᒪᓗᓐᓇᖅᑐᒥᒃ ᑎᑭᕋᑖᑦᓯᐊᖑᑦᓱᓂ – ᐳᕙᓪᓗᓇᕐᒧᖅᑲᐃ – ᒪᑭᔪᐃᑦᑑᑲᐃᓐᓇᖅᐸᓕᖅᓱᓂᓗ ᑕᖅᑭᕋᓴᕐᓂᒃ. ᐊᐱᕆᔭᐅᒐᒥ ᓯᑳᓚᓐᒧᑦ ᐅᑎᕋᔭᕐᒪᖔᖅ, ᐋᒡᒑᖅᑐᒥᓂᖅ, "ᖁᐃᖅᑐᖅᑐᐊᓗᑐᐃᓐᓇᐅᓇᕐᒪᒡᒎᖅ" ᓯᑳᓚᓐ.
ᑕᑯᒍᒃ : ᐊᓕᒃᓵᓐᑐ ᒪᒃᑖᓄᑦ, ᑎᑎᖅᑐᒐᖅ ᐅᒥᐊᖅᑐᖃᑦᑕᕐᓂᒥᓂᖓᓂᒃ ᐃᓄᓪᓗᐊᐱᐅᑉ, ᐃᓅᓱᑦᑐᖅ ᐃᓄᒃ ᒪᑉᐱᒐᖅ... 41.
ᐄᑉᐳᓘ 1, 1840, ᐃᓄᓪᓗᐊᐱᒃ ᐃᑭᔪᒥᓂᖅ ᐅᐃᓕᐊᒻ ᐱᐊᓂᐅᑉ ᐅᒥᐊᕐᔪᐊᖓᓄᑦ ᐅᑎᖅᐸᓪᓕᐊᓂᐊᓕᕋᒥ ᕿᑭᖅᑖᓘᑉ ᐊᑯᑭᑦᑐᐃᓪᓗ ᓄᓇᖓᑕ ᐃᖏᕋᓴᖓᓄᑦ. ᓇᒃᓴᖅᑐᒥᓂᖅ ᐊᓐᓄᕌᓂᒃ, ᓂᖅᓯᐅᕈᑎᓂᒃ, ᖁᑭᐅᑎᓂᒃ, ᓴᒃᑯᓂᓪᓗ ᒥᓇᕆᓪᓗᓂᒋᑦ ᐃᓄᓐᓄᑦ ᓄᓇᖅᑲᑎᒥᓄᑦ, ᓴᐃᓃᓯᑯᑦ ᓄᓇᖓᓐᓂ ᔭᕐᕋᒥᒃ ᓴᓇᔭᐅᓯᒪᔪᓂᒃ ᐊᓪᓕᕋᖅᑕᕇᓂᒃ ᑏᑑᑎᒥᓪᓗ ᐊᓈᓇᒥᓄᑦ ᓄᖑᓂᕐᒧᑦ, ᒥᓇᖃᓯᐅᑎᓪᓗᓂ. ᐅᑎᖅᐸᓪᓕᐊᑦᓱᓂ, ᑲᑎᓯᒋᐊᖓᖅᑐᒥᓂᖅ ᐊᑯᑭᑦᑐᒥᐅᒥᒃ ᐃᓄᒻᒥᒃ. ᐅᒥᐊᓕᑦᑕᖓᓐᓂᒃ ᑳᐱᑕᐃ ᐱᐊᓂᒥᒃ ᓇᐅᒃᑰᓂᐊᕐᒪᖔᖅ ᒪᐅᓈᓚᔨᐅᓂᑯ ᐊᖅᑯᑎᖓᒍᑦ ᐸᓐᓂᖅᑑᑉ ᑲᖏᖅᓱᐊᓗᓕᐊᕆᐊᖓᒍᑦ, ᑎᓄᔾᔨᒻᒧᑦ, ᑕᐃᒫᒃ ᑕᐃᖃᑦᑕᓂᕐᒪᐅᒃ ᐊᓈᓇᖓ ᑐᓴᕐᓂᕋᒥ ᐅᒥᐊᕐᔪᐊᖅ ᑎᑭᓚᖓᓂᖓᓂᒃ ᖃᓂᔮᓕᕇᖅᑐᒥᓂᐅᓪᓗᓂᓗ ᐃᕐᓂᕐᒥᓂᒃ ᑲᑎᓯᓂᐊᕋᒥ. ᐅᓂᒃᑳᕆᒋᐊᙵᖃᖅᑕᖅᑕᒥᓂᖏᑦ ᐃᓄᓪᓗᐊᐱᐅᑉ ᐃᓚᒥᓄᑦ ᕿᒥᖅᓲᒥ ᓯᑳᓚᓐ ᒥᒃᓵᓅᖓᓐᓂᖏᑦᑐᑦ, ᐊᑯᑭᑦᑐᐃᓪᓕ ᐃᓄᖏᑕ ᖃᓄᕐᓗ ᐅᖃᓕᒪᓂᖏᑕ ᒥᒃᓵᓄᖔᖅ ᐅᓂᒃᑳᖅᐸᑦᑐᒥᓂᖅ. ᖁᑭᐅᒻᒥᓪᓗᑦᑕᐅᖅ ᖃᓄᖅ ᖁᑭᖅᓯᒍᑕᐅᓲᖑᓂᖓᓂᒃ ᑲᑦᓱᖓᐃᒋᔭᓕᒥᓂᖅ ᑕᑯᖅᑯᔾᔨᒍᒪᓪᓗᓂ. ᐅᓪᓗᒐᓚᐃᑦ ᐊᓂᒍᖅᓯᒪᓕᖅᑎᓪᓗᒋᑦ, ᐃᓄᓪᓗᐊᐱᒃ ᓄᓕᐊᓂᑦᑐᒥᓂᖅ, ᐊᒥᑕᒃᒥᒃ, ᑐᒃᑐᓕᐊᓯᔪᒥᓂᐅᓪᓗᑎᓪᓗ. ᐃᕐᓂᓕᒥᓃᒃ, ᐊᖓᓗᒃᒥᒃ.
ᖁᔭᓐᓇᒦᒃ ᐃᓄᓪᓗᐊᐱᒃ ᓄᓇᙳᐊᓕᐅᕐᓂᕐᒪᓐ ᓇᐅᒃᑰᕆᐊᖃᕐᓂᖓᓂᓪᓗ ᓇᓗᓇᐃᔭᐃᓐᓂᕐᒪᓐ, ᐸᓐᓂᖅᑑᑉ ᑲᖏᖅᓱᐊᓗᐊ ᐊᒃᓱᐃᓂᖅᐹᕈᕈᒫᕐᓂᐊᑎᓪᓗᒍ ᐊᕐᕙᓂᐊᕐᕕᐅᓂᒃᑯᑦ 1900–ᓚᖏᓐᓂ ᐊᕐᕌᒍᐃᑦ. ᐃᓄᓪᓗᐊᐱᒃ ᐃᖅᑲᓇᐃᔭᓚᐅᓪᓚᖃᑦᑕᖅᑐᒥᓂᖅ ᐊᕐᕙᓂᐊᖅᑏᑦ ᑳᐱᑕᐃᖏᓐᓄᓐ ᑭᓯᐊᓂ ᐅᒥᐊᒃᑯᑦ ᐅᐃᕚᒃᑲᓐᓂᓚᐅᖅᓯᒪᓐᓂᖏᑦᑐᖅ ᑕᕆᐅᑉ ᐊᑭᐊᓄᑦ. ᓱᓕᓕ, ᓯᑳᓚᓐᒦᑦᓱᓂ ᐳᕙᓪᓗᓕᖅᑐᒥᓂᐅᕙᓗᑦᑐᖅ ᑎᒥᖓᓃᖏᓐᓇᓂᕐᒪᓐ, ᑐᖁᒍᑎᒥᓂᖓ ᐊᐅᔭᐅᓕᖅᑎᓪᓗᒍ 1847–ᒥ. ᐊᕙᑎᑦ ᖁᓕᓪᓗ ᑐᖔᓃᑦᑐᓂᑐᒃ ᐅᑭᐅᓕᒥᓂᖅ.