ᐅᕙᓃᑦᑐᑎᑦ : ᐊᖏᕐᕋᖅ » ᑲᑉᑕᓐ ᔮ ᐆᐊᕆᓐ ᓯᐸᐃᓱ
ᑲᑉᑕᓐ ᔮ ᐆᐊᕆᓐ ᓯᐸᐃᓱ
74 Ko
ᑳᑉᑕᓐ ᔮᓐ ᐆ. ᓯᐸᐃᓲᑉ ᐊᔾᔨᓐᖑᐊᖓ
ᔮᓐ ᐆᐊᕆᓐ ᓯᐸᐃᓱ, ᒍᕉᑕᓐ ᑲᓂᐊᑎᑲᑦᒥᐅᑕᖅ ᑲᒪᓇᒻᒪᕆᑦᑐᓂ ᐃᖅᑲᐅᒪᔭᐅᔪᖅ ᐅᑭᐅᖅᑕᖅᕙᑐᑉ ᑲᓇᓐᓇᖅᐸᓯᖓᓂ ᐊᕝᕙᒐᓱᐊᖃᑦᑕᖅᑐᒥᓂᕐᓂ. ᐃᓄᐃᑦ ᐃᓕᖅᑯᓯᖏᓐᓂᒃ ᑎᒍᓯᓪᓗᓂ ᐊᑐᖅᑐᒥᓂᖅ ᐊᒻᒪᓗ ᑕᐃᒫᔅᓴᐃᓐᓇᖅ ᐊᑲᐅᔅᓴᐸᑦᑐᒥᓂᖅ ᓄᓇᒃᑯᑦ ᐃᖏᕐᕋᓪᓗᓂ ᕿᒧᔅᓯᒃᑯᑦ ᐅᕝᕙᓘᓐᓃᑦ ᐃᒥᕆᐊᔅᓴᖅ ᓇᑦᑎᐅᑉ ᐊᐅᖓᓂᒃ ᐸᓂᑲᒻᒥᓐ ᓯᑯᒦᓪᓗᓂ ᐊᒻᒪᓗ ᓇᐅᓕᔅᓯᓂᕐᒥᒃ ᓴᕕᕋᔭᒻᒧᓐ ᐊᕝᕕᐊᓗᒻᒧᓐ. ᐊᑕᐅᓯᐊᖅᑐᓂ ᕿᖓᖓᑕ ᓴᐅᓂᖓ ᓱᕋᑦᑐᒥᓂᖅ ᐃᐱᑲᓴᑦᑎᐊᖅᑐᓂᓗ ᖃᓪᓗᓈᓂ ᐊᕐᕕᐊᓗᐊᓄᑦ ᒪᕐᕈᐊᑎᖅᑐᓂ ᐅᒥᐊᕋᓛᖓ ᐱᒋᐊᖅᑕᐅᓂᕐᖓᓐ. ᐊᓯᐊᒍᑦᑕᐅᖅ ᐃᒻᒥᓂᖅ ᐅᓗᕆᐊᓇᖅᑐᒦᑎᓐᓂᕐᒥᔪᖅ ᓵᓐᖓᑎᓪᓗᓂ 40ᓂᒃ ᐃᓄᓐᓂᒃ ᐊᖑᑎᓂᒃ, ᑎᒍᒥᐊᖅᑐᓂ ᐅᒥᐊᕐᔪᐊᒧᒥ ᐊᑦᑐᓈᓄᑦ ᐱᑐᕝᕕᕈᓗᒻᒥᒃ, ᐃᑲᔪᖅᑎᖓᑕ ᐊᒥᑰᑉ ᐃᓅᓯᖓᓂᒃ ᐱᐅᓕᑦᑎᒐᓱᐊᖅᑐᓂ. ᑕᒪᔾᔭᐅᒐᓗᐊᖅᑎᓪᓗᒋᓪᓕ ᑖᓐᓇᓕ ᓯᐸᐃᓱ ᐃᖅᑲᐅᒪᔭᐅᓛᖑᕙᓪᓚᐃᔪᖅ ᓇᔅᓴᓂᕐᖓᓐ ᔮᓂᕘᒃᑯᓐᓂᑦ, ᑭᒥᓗᒃᑯᓐᓂ ᐊᒻᒪᓗ ᑯᓪᓗᐊᕐᔪᒻᒥ ᓚᓐᑕᓐᑖᖅᑲᐅᒧᓐ ᔮᓂᕘ ᐃᖅᑲᖅᑐᐃᕕᒻᒥ ᐃᖃᑐᖅᑕᐅᔪᓂ ᐅᖃᕆᐊᖅᑐᖅᑎᑕᐅᑎᓪᓗᒍ, ᐱᔾᔪᑎᖃᖅᑐᑎᒃ ᐱᖓᓱᓂᒃ ᐊᖅᕕᓂᒃ ᑎᓪᓕᒑᒥᓂᐅᔪᓂᒃ.
ᐱᐅᒻᒥᒪᑦᑕᐅᖅ ᖃᐅᔨᒪᒋᐊᔅᓴᖅ ᐅᐱᒋᔭᐅᓐᖏᓂᖅᓴᓂᒃ ᐃᓅᓯᖓᑕ ᐃᓚᒥᓂᖏᓐᓂᒃ ᑖᔅᓱᒪ ᐊᕝᕙᒐᓱᐊᖅᑎᓄ ᐊᖏᔪᖅᑳᕆᔭᐅᔪᒧᓐ. ᖃᐅᔨᒪᒐᑦᑕ 1881ᒥ ᓯᐸᐃᓱ ᐅᑭᐅᖅᑕᖅᑐᒧᓐ ᐅᒥᐊᕐᔪᐊᒃᑯᑦ ᑕᒪᐅᓐᖓᓂᕐᖓᓐ ᐅᒥᐊᕐᔪᐊᖅ ᐄᕋ ᐅᒥᐊᕐᔪᐊᕐᒥᐅᑕᖃᖅᑐᓂ ᐊᑕᖏᑦᑎᐊᐸᓗᑦᑐᑎᒃ ᑎᒍᔭᐅᓵᖅᑐᑎᒃ ᐅᒥᐊᕐᔪᐊᒧᓐ ᐊᐅᓪᓚᕈᔾᔭᒥᓂᕐᓂᒃ ᓂᐅ ᔪᐊᑦ ᓯᑎᒥᑦ. ᒪᕐᕈᑐᐊᒃ ᐅᒥᐊᕐᔪᐊᕐᒥᐅᖑᖃᑎᖏᒃ ᐊᒻᒪᓗ ᒪᕐᕉᑦᑕᐅᖅ ᐅᒥᐊᒧᓐ ᐊᖁᑏᑦ ᐱᔪᒪᓪᓗᑎᒃ ᐊᐅᓪᓚᖃᑕᒥᓃᑦ. (ᑰᓪᕕ 1990: 156)
ᓯᐸᐃᓱ ᐃᓕᓴᐃᔨᑦᑎᐊᕆᑦᑐᒥᓂᐊᓗᒃ ᐅᑭᐅᖅᑕᖅᑐᒨᕆᐅᕋᒥ 1857ᒥ, ᑕᒪᐅᓐᖓᕋᒥ ᐃᓚᐅᓪᓗᓂ ᑳᑉᑕᓐ ᑯᕆᔅᑕᐳ ᕖ ᓵᐳᓪᒧᓐ, ᑕᐃᓐᓇᐃᓛᒃ ᓯᕗᓪᓕᖅᐹᒥᓂᐅᖃᑕᐅᔪᖅ ᐊᒥᐊᓕᑲᒥᐅᓄᑦ ᐊᕝᕙᒐᓱᐊᖅᑎᓄᑦ ᐅᑭᐊᓪᓕᔪᒥᓂᐅᔪᓄᑦ ᑎᓄᔾᔨᕕᔾᔪᐊᕐᒥ. ᓵᐳᓪ ᕿᒪᑦᑕᐅᓂᕐᖓᓐ ᑕᐃᑯᖓ ᐅᒥᐊᕐᔪᐊᒧᓐ ᐊᑎᓕᒻᒧᓐ ᒪᑭᓕᐊᓚᓐ 1851ᒥ, ᐱᖃᑎᖃᖅᑐᓂ ᔪᐊᔾ ᑕᐃᓴᓐ ᐊᒻᒪᓗ ᓯᑦᓂ ᕙᑎᓐᑕᓐ, ᐊᓯᖏᓐᓂᓪᓗ. ᑖᔅᓱᒪ ᐊᕝᕙᒐᓱᒋᐊᕐᓂᒥᓂᐅᑉ ᐱᒻᒪᕆᐅᓂᖓ ᐊᖏᔫᓐᓂᖅᑯᖅ ᐱᔾᔪᑎᒋᓪᓗᒍ ᑖᕗᖓᓕᒫᖅ ᐊᓯᕈᐃᓐᓂᕐᖓᓐ ᖃᓄᖅ ᐊᕝᕙᒐᓱᐊᓲᖑᒻᒪᖔᑕ. ᓵᐳᓪ ᐃᓕᒋᐊᓕᒥᓂᖅ ᐃᒻᒥᓂᒃ ᐱᓯᒪᒋᐊᔅᓴᖅ ᐅᑭᐅᒃᑯᑦ ᐊᑐᓕᖅᑎᑎᓪᓗᓂ ᐃᓄᐃᑦ ᐱᖅᑯᓯᖏᓐᓂᒃ, ᑕᒪᒃᑯᓂᖓ ᐃᓄᐃᑦ ᐊᓐᓄᕌᖏᓐᓂᒃ ᒥᖅᑯᓕᓐᓂᒃ, ᓂᕆᖃᑦᑕᖅᑐᓂᓗ ᐃᓄᐃᑦ ᓂᕿᖏᓐᓂᒃ, ᐊᒻᒪᓗ ᕿᒧᔅᓯᖃᑦᑕᓂᕐᒥᒃ. ᑕᐃᔅᓱᒪᓂᓕ ᐃᓄᐃᑦ ᐊᒻᒪᓗ ᐅᑭᐅᖅᑕᖅᑐᒥ ᐃᒻᒥᓂᒃ ᐱᓯᒪᒋᐊᔅᓴᖅ ᖃᐅᔨᒪᓂᖏᑦ ᐊᓯᐊᒎᖅᕕᖃᕋᓂ ᐃᓚᓕᐅᑎᓪᓚᕆᑦᑐᒥᓃᑦ ᐱᑦᑎᐊᖃᑦᑕᕐᓂᖏᓐᓄᑦ ᐊᕝᕕᓂᒃ ᐃᓐᖓᓚᑖᖅᑲᐅᒥᐅᑕᐃᑦ ᓯᒃᑳᑦᑏᓪᓗ ᐊᕝᕙᒐᓱᐊᖅᑏᑦ.
ᑕᒪᐅᓐᖓᕆᐅᕋᒥᓕ, ᑕᐃᓐᓇ ᐱᔪᒪᔪᒻᒪᕆᐅᓗᒃ ᓯᐸᐃᓱ ᑐᖁᑦᑎᔪᒥᓂᖅ 9ᓂᒃ, 12ᓂᒃ ᑲᑎᑦᑐᒋᑦ ᐊᕝᕙᑦᑕᒥᓂᖏᓐᓂᒃ. 1863ᒥᓕ, ᓄᓇᖓ ᐅᓇᑕᖅᕕᐊᓘᑎᓪᓗᒍ, ᑳᑉᑕᕈᖅᑐᒥᓂᖅ ᐅᑭᐅᖅᑕᖅᑐᒧᓪᓗ ᐅᑎᖅᑐᒥᓂᐅᓪᓗᓂ ᐊᖏᔪᖅᑳᖑᓕᖅᑐᓂ ᐅᒥᐊᕐᔪᐊᒥ ᐊᑎᓕᒻᒥ ᐋᒃᑐᕐ. ᑕᐃᒪᓕ ᑎᑭᐅᑎᒐᒥ ᓛᐸᑐᐊᑉ ᓵᖓᓄᑦ ᕕᐊᓪ ᐊᐃᔪᓪ ᖃᓂᒋᔭᖓᓂ, ᑕᐃᓐᓇ ᐋᒃᑐᕐ ᒪᕐᕈᐃᓂᒃ ᐅᒥᐊᕋᓛᓂᒃ ᑲᑎᓯᔪᒥᓃᑦ (ᑰᓪᕕ 1990: 145); ᐊᐃᑉᐹᓂ ᐅᒥᐊᒥ ᓯᐸᐃᓲᑉ ᐊᖏᔪᖅᑳᒥᓂᖓ ᑯᕆᔅᑕᐳ ᓵᐳᓪ ᐃᑭᒪᔪᒥᓂᐅᓪᓗᓂ. ᓵᐳᒃᑯᑦ ᐅᒥᐊᕐᔪᐊᕐᒥᐅᓕᒫᖏᓪᓗ ᐅᒥᐊᕐᔪᐊᒥᓂᒃ ᐊᑎᓕᒻᒥᒃ ᔪᐊᔾ ᕼᐃᐊᓐᓄᓕ ᓂᐅᓵᕋᖅᑐᒥᓃᑦ ᓯᑯᓄᑦ ᓯᕋᑦᑕᐅᓂᖓᓐ ᕼᐊᑦᓴᓐ ᓱᓪᓗᕐᔪᐊᖓᓂ.
ᐅᐊᑦᑎᐊᕈᒃᑲᓂᕐᓕ ᓯᐸᐃᓱ ᐊᖏᔪᖅᑳᖑᓕᖅᑐᒥᓂᖅ ᐱᖓᓱᓄᑦ ᐊᕐᕙᒐᓱᐊᖅᑎᓄᑦ ᐅᒥᐊᕐᔪᐊᓄᑦ ᐊᑎᓕᓐᓂᒃ ᓇᐃᔪᓪ, ᐄᕋ, ᐊᒻᒪᓗ ᕌᔅᕕᐊᓪ ᑭᖕ, ᑖᒃᑯᓄᖓ ᐅᐃᓕᐊᒻᔅ ᓇᒻᒥᓂᖃᐅᑎᖓᓄᑦ ᓚᓐᑕᓐᑖᖅᑲᐅᒥ. ᐱᒋᐊᖅᑎᑦᑎᔪᒥᓂᖅ ᐊᕝᕙᒐᓱᐊᖅᕕᒻᒥᒃ ᐊᑯᓕᐊᕐᒥ ᐊᑎᖃᖅᑎᑕᖓᓂᒃ ᕼᐊᑦᓴᓐ ᓱᓪᓗᕐᔪᐊᖓᓂ 1880ᒥ, ᕿᑭᖅᑕᒥ ᖃᐅᔨᒪᔭᐅᔪᒥ ᐃᓄᓐᓄᑦ ᐃᖃᖅᑎᓕᒃ, ᐱᖓᓐᓇᖓᓂ ᐅᓪᓗᒥ ᑭᒻᒥᕉᓕᖅᑑᑉ (ᓚᐃᒃ ᕼᐊᕗ). ᑕᐃᓐᓇ ᕌᔅᕕᐊᓪ ᑭᖕ ᐊᑐᖅᑕᒥᓂᖅ ᐳᑦᑕᓪᓗᓂ ᐅᖅᓱᓕᕆᕕᐅᓪᓗᓂ ᐊᑯᓕᐊᑉ ᓴᓂᐊᓂ, ᑕᐅᓇᓂ ᐃᓄᓐᓄᑦ ᓄᓇᒋᔭᐅᑲᐃᓐᓇᐸᑦᑐᒥᓂᕐᒥ ᐊᕐᕌᒎᑉ ᐃᓚᖓᓂ. ᑕᐃᑲᓂ ᐊᓚᐃᓐᖓᒃᑯᑦ ᐃᓚᒌᑦ ᐱᒻᒪᕆᒥᓃᑦ ᐃᖅᑲᓇᐃᔭᖃᑦᑕᖅᑐᑎᒃ ᓯᐸᐃᓱᒧᓐ ᐊᒥᐊᓕᑲᒥᐅᑕᕐᓄᓪᓗ (ᐄᐳ 1989: 43-68). ᐊᒥᐊᓕᑲᒥᐅᑕᐃᑦ ᐊᕝᕙᒐᓱᐊᖅᑏᑦ ᐅᒥᐊᕐᔪᐊᒥ ᐃᓅᕙᑦᑐᒥᓃᑦ ᐊᕐᕌᒍᓕᒫᖅ, ᑕᐃᒃᑯᐊᓕ ᓇᐃᔪᓪ ᐊᒻᒪᓗ ᐄᕋ ᐅᓯᑲᖅᑕᐸᑦᑐᒥᓃᒃ ᑭᓱᔅᓴᖏᓐᓂᒃ ᐅᓯᕙᑦᑐᑎᓪᓗ ᐊᑯᓕᐊᕐᒥ ᐅᖅᓱᓕᐅᒥᓂᕐᓂᒃ, ᓱᖅᑲᓂᒃ, ᑭᓯᓐᓂᓪᓗ ᑕᐅᓄᓐᖓᐅᔾᔭᐅᓂᐊᕐᖓᑕ ᓚᓐᑕᓐᑖᖅᑲᐅᒧᓐ,
ᔮᓐ ᐆ. ᓯᐸᐃᓱ, ᑕᐃᒫᑦᑕᐅᖅ ᑕᐃᒪᐃᓚᐅᖅᓯᒪᓐᓂᕋᒥ, ᐃᓕᓴᐃᓕᕐᓂᕐᒥᔪᖅ ᐃᓅᓱᑦᑐᒥᒃ ᐅᒥᐊᕐᔪᐊᕐᒥᐅᑕᕐᒥᒃ ᖃᐅᔨᒪᔭᐅᓕᒻᒪᕆᓐᓂᐊᖅᑐᒥᒃ ᐅᑭᐅᖅᑕᖅᑐᒥ ᐊᕝᕙᒐᓱᐊᕐᓂᕐᒥ. 1875ᒥ ᐊᕐᕌᒍᖃᖅᑐᓂ 17ᓂᒃ, ᔪᐊᔾ ᑰᒧ ᐅᑭᐅᖅᑕᖅᑐᒧᓐ ᐅᒥᐊᕐᔪᐊᒃᑯᑦ ᑕᒪᐅᓐᖓᕆᐅᖅᑐᒥᓂᖅ ᐃᑭᒪᓪᓗᓂ ᐅᒥᐊᕐᔪᐊᒧ ᐊᑎᓕᒻᒧᓐ ᓚᓐᑕᓐᑖᖅᑲᐅᒥᐅᑕᕐᒧᓐ ᓇᐃᔪᓪ, ᑳᑉᑕᓐ ᓯᐸᐃᓱ ᐊᖏᔪᖅᑳᕆᓪᓗᓂᐅᒃ. ᑰᒧ ᓯᐸᐃᓱᒧ ᐃᓚᐅᒃᑲᓂᕐᓂᕐᒥᔪᖅ ᐃᖏᔪᖅᑳᕈᔫᖃᑕᐅᓪᓗᓂ ᐱᖓᓱᐊᖅᑎᖅᑐᓂ 1889ᒥᑦ 1892ᒧᓐ, ᐅᒥᐊᕐᔪᐊᒃᑯᑦ ᐄᕋᒃᑯᑦ, ᑕᐃᓐᓇᐃᓛᒃ ᑰᒨᑉ ᐊᖏᔪᖅᑳᖑᕕᓕᓛᖅᑕᒥᓂᖓᓂ 1895ᒥ ᑭᖑᓂᐊᓄᑦ. ᔪᐊᔾ ᑰᒧ ᐃᖅᑲᓇᐃᔭᑦᑎᐊᖅᑐᐊᓘᕙᑦᑐᒥᓂᖅ ᐊᑯᓂᐊᓗᓪᓗ ᐃᓄᓐᓂᒃ ᐱᖃᑎᓕᒥᓂᐅᓪᓗᓂ, ᐊᒻᒪᓗ ᑭᖑᓪᓕᖅᐹᒥᓂᖅ ᐱᒻᒪᕆᐅᓪᓗᓂ ᐊᒥᐊᓕᑲᒥᐅᓄᑦ ᐊᕝᕙᒐᓱᐊᖅᑎᓄᑦ ᑲᓇᓐᓇᐅᑉ ᐅᑭᐅᖅᑕᖅᑐᖓᓂ.
ᑖᒃᑯᐊᓕ ᐊᕝᕙᒐᓱᐊᖅᑐᓂ ᐊᐅᓪᓚᖃᑦᑕᕐᓂᒥᓂᖏᑦ ᔮ ᐆᕆᓐ ᓯᐸᐃᓲᑉ. ᑕᐃᓐᓇ ᑳᑉᑕᓐ ᐃᓐᓇᐅᓂᕐᒥᓄᑦ ᓄᖅᑲᖓᓕᖅᑐᓂ ᓄᓇᓕᒥᓂᖅ ᐱᕈᖅᓰᕕᓕᒻᒥ ᑲᓂᐊᑎᑲᑦᒥ 1892ᒥ, ᑕᐅᓇᓂᓗ ᐃᓅᒍᓐᓃᖅᑐᒥᓂᐅᓪᓗᓂ 1917ᒥ.