ᐅᕙᓃᑦᑐᑎᑦ : ᐊᖏᕐᕋᖅ » ᐅᖅᓱᕆᐊᖅ ᐅᖅᓲᔭᖅᑕᓕᒃ
ᐅᖅᓱᕆᐊᖅ ᐅᖅᓲᔭᖅᑕᓕᒃ
ᐅᖅᓱᕆᐊᖅ (ᐅᖅᓱᕆᐊᖅ ᐅᖅᓱᕆᐊᕐᔪᐊᓘᓐᓃᑦ ᐃᓄᒃᑎᑐᑦ ᑕᐃᔭᐅᒍᓯᖓ) ᖃᓪᓗᓈᓃᙶᖅᓯᒪᔪᓄᑦ ᐅᑮᕕᐅᒐᔪᑉᐸᑦᑐᒥᓂᖅ ᑐᓚᑦᑕᕐᕕᒃ ᑲᖏᖅᓱᐊᓗᒻᒥ ᐊᕐᕕᓂᐊᕐᕕᐅᕙᑦᑐᒥᓂᖅ99 ᐃᓚᒋᔭᐅᓪᓗᓂᐅᓗ ᐃᒪᕕᒻᒥ ᕿᑭᖅᑕᐃᑦ ᐱᖓᓲᓪᓗᑎᒃ ᕿᑭᖅᑕᐃᑦ ᐊᓯᖏᑦ, ᐅᑯᐊᙳᓪᓗᑎᒃ: ᑐᖁᕕᐅᓚᐅᖅᑐᒥᓂᖅ ᕿᑭᖅᑕᖅ ᐊᑎᓕᒃ (Deadman's Island), ᒥᑎᓕᒃ (Mittilik Island) ᐊᒻᒪᓗ Quartzite Island. ᑕᐃᓐᓇ ᕿᑭᖅᑕᐃᑦ 40-ᑭᓛᒥᑐᓂᒃ ᐅᖓᓯᓐᓂᓕᒃ ᓯᓈᓂᒃ ᑲᖏᖅᖠᓂᐅᑉ.
ᐅᖅᓱᕆᐊᖅ ᐊᑲᐅᕙᑦᑐᒥᓂᖅ ᐅᑮᕕᒋᓪᓗᒍ. ᕋᔅ ᓇᓗᓇᐃᖅᓯᔪᖅ ᖃᖏᖅᓱᓪᓚᑐ ᐊᑲᐅᔪᖅ ᑐᖁᕕᐅᓚᐅᒻᓯᒪᔪᕕᓂᖅ ᕿᑭᖅᑕᖅ ᐊᑐᐊᕐᓗᒍ ᑐᓚᕝᕕᒋᒋᐊᖓ ᐊᑲᐅᒋᔭᐅᓂᖅᐸᐅᕙᑦᑐᒥᓂᖅ ᑳᐱᑕᐃᓄᓐ.
ᑐᓚᑦᓯᒪᕕᒋᒋᐊᖓ ᐊᑲᐅᓂᖅᐹᒥᓂᖅ ᓂᒋᐊᑕ ᐅᐊᖕᓇᒃᐸᓯᒐᓃᑦᑐᖅ ᓯᔾᔭᖓ ᐅᖅᓱᕆᐊᑉ. ᓯᓚᑎᒐᓅᕆᐊᒃᑲᓐᓂᕐᕕᖓ ᐊᔪᕐᓇᐸᓐᓂᖏᒻᒪᓐ ᐅᖓᑖ ᑐᖁᕕᐅᓚᐅᖅᑐᒥᓂᐅᑉ ᕿᑭᖅᑕᐅᑉ, ᐅᒥᐊᕐᔪᐊᖅ ᕿᓴᖅᓯᒪᒍᓐᓇᓱᓂ ᓯᑕᒪᓄᑦ ᑕᓪᓕᒪᓄᓪᓘᓐᓃᓐ ᐃᑎᒐᐃᑦ ᐱᖓᓲᔪᖅᑐᑦ ᐆᑦᑐᕐᓗᒍ ᐃᑎᓂᓕᒃ, ᑭᓯᐊᓂ ᐅᓗᕆᐊᓇᙱᓂᖅᓴᖅ ᑲᖏᖅᓱᖅ ᐳᓚᒋᐊᒃᑲᓂᕐᓗᒍ ᕿᓴᖅᓯᒪᕕᑦᓯᐊᕙᐅᕙᓐᓂᕐᒥᔪᖅ, ᖂᑭᑦᑑᓪᓗᓂ ᐳᓚᕕᒋᒋᐊᓕᒃ ᑕᐃᔭᐃᕙᑦᑐᒥᓂᖅ "ᖂᑭᑦᑐᖅ" ᒪᕐᕉᒃ ᐃᑎᒐᐃᑦ ᐱᖓᓲᔪᖅᑐᑦ ᐆᑦᑐᕐᓗᒍ ᐃᑎᓂᓕᒃ ᐊᕙᑏᒃ ᒪᕐᕉᒃ ᖁᓕᓪᓗᓂᒃ ᐆᒃᑑᑎᓂᒃ ᓯᓕᓐᓂᓕᒃ. ᐊᕐᕕᓂᐊᖅᑏᑦ ᖁᑭᑦᑐᒃᑰᕋᔪᒃᐸᑦᑐᒥᓃᑦ ᐅᓕᙵᓕᕋᐃᒻᒪᓐ ᐊᑐᖓᔭᐅᔨᒐᔪᒧᑦ ᐃᒪᕐᒧᑦ ᒪᐃᓕᒥᒃ ᐊᕝᕙᒥᓪᓗ ᓯᓕᓐᓂᓕᒃ. (Ross 1975: 47)
ᐅᖅᓱᕆᐊᖅ ᐅᑮᕕᐅᒐᔪᑉᐸᑦᑐᒥᓂᖅ ᑲᖏᖅᓱᐊᓗᒻᒥ ᑐᓚᑦᑕᕐᕕᒃ ᐊᑯᓐᓂᖏᓐᓂ 1870 – 1887. ᐅᖃᐅᓯᕆᔭᕆᐊᓕᒃ ᐃᒪᐃᓐᓂᒥᓂᖅ ᑕᒪᓐᓇᐅᓂᖓᓂ, ᓯᕗᓂᑐᖃᖓᒍᑦ ᒥᐊᓕᒐᒥᐅᑦ ᓯᒃᑳᓯᒃᑯᓪᓗ ᓂᐅᕕᖅᑎᖏᑦ ᐊᕐᕕᓐᓂᐊᕋᓱᐊᖃᑦᑕᕐᓂᖏᓐᓂ, 100– ᐊᕐᕌᒍᐃᑦ ᓯᕗᓂᖓᒍᑦ, ᐊᒡᓛᑦ ᑕᒫᓂ (ᐊᑯᓐᓂᖏᓐᓂ 1765 ᐊᒻᒪᓗ 1777) ᓂᐅᕕᖅᑎᒃᑯᑦ ᐊᕐᕕᓐᓂᐊᕆᐊᕋᓱᐊᖃᑦᑕᓚᐅᖅᑐᕕᓃᑦ ᐊᕐᕕᓗᐊᖅᐸᒐᑎᒃ ᑕᐃᑲᓂ.
ᑕᐃᓐᓇ ᐊᑲᐅᓂᖃᐅᖅᐸᑦᑐᒥᓂᖅ, ᐅᑮᕕᐅᓪᓗᓂ ᐊᒥᓱᒐᓚᓐᓄᑦ ᐅᒥᐊᕐᔪᐊᓄᑦ (ᑕᓪᓕᒪᐃᑦ ᐱᖓᓲᔪᖅᑐᓄᑦ ᑎᑭᐅᓯᒪᔪᓂᒃ) ᐅᖅᓱᕆᐊᕐᓗ ᓯᑯᖃᕈᓐᓃᐸᓐᓂᖅᓱᓂ ᐅᐱᕐᖓᑦᓴᓕᕋᑖᖅᑎᓪᓗᒍ, ᐊᕐᕕᓂᐊᖅᑏᑦ ᐊᕐᕕᒐᓱᐊᕈᓐᓇᖅᓯᕕᒋᑦᓱᒍ ᓯᕗᓂᑐᖃᖓᒍᑦ ᐅᑮᔪᑦ ᐊᓯᖏᑕ ᑐᓚᑦᑕᕐᕕᖏᓐᓂ Depot–ᕿᑭᖅᑕᖓᓂ, ᖃᑎᒃᑕᓕᒻᒥ ᓇᐅᔮᓂᓗ
1870–ᒥᒃ 1887–ᒧᑦ, ᑲᖏᖅᓱᒃ ᐊᑐᖅᑕᐅᖏᓐᓇᐸᑦᑐᒥᓂᖅ, ᐊᑲᐅᒋᔭᐅᓗᐊᕈᑎᒋᕙᑦᑕᒥᓂᖓ ᐃᒻᒪᖄ ᐅᒥᐊᕐᔪᐊᑦ ᐊᓂᓴᕋᐃᒍᓐᓇᐸᓐᓂᕐᒪᑕ ᑲᖏᖅᓱᒥᒃ ᓯᑯᖃᕋᓗᐊᖅᐸᑦ ᐅᐱᕐᖓᖅᓴᓕᕋᑖᖅᑎᓪᓗᒍ... ᕿᓚᒻᒥᐅᓂᖅᓴᖅ ᑕᐃᒃᑯᓇᖓᑦ Depot–ᑭᑭᖅᑕᖓᓂ ᐊᒻᒪᓗ ᖃᑎᒃᑕᓕᐅᑉ ᒪᕐᕉᓂᓪᓗ ᑕᖅᑮᓐᓂᒃ ᕿᓚᒥᐅᓂᖅᓴᖅ ᐅᒥᐊᕐᔪᐊᓂ ᓇᐅᔮᒦᑦᑐᓂᒃ. (Ross 1975: 47)
ᓯᑯᐃᓴᕋᐃᒐᓗᐊᖅᑎᓪᓗᒍ, ᐅᖅᓱᕆᐊᖅ ᑐᓚᑦᑕᕐᕕᐅᒍᓐᓃᐸᓪᓕᐊᑐᐃᓐᓇᖅᑐᒥᓂᖅ 1877 ᑭᖑᓂᖓᒍᑦ ᕿᒪᐃᓐᓇᖅᑕᐅᓚᐅᙱᓂᕐᒥᓂ ᐱᒋᐊᓕᖅᑎᓪᓗᒍ ᐊᕐᕌᒍᖅ 1890 ᐅᖓᓯᓐᓂᖓ ᐅᓗᕆᐊᓇᖅᑐᒦᑦᑕᐃᓕᓂᕐᓗ ᐱᔾᔪᑎᒋᓪᓗᒍ. ᐃᓄᐃᓴᓪᓕᕙᓪᓕᐊᑐᐃᓐᓇᖅᑐᒥᓃᑦ ᐊᕐᕖᑦ ᐅᖅᓱᕆᐊᒥ, ᐊᕐᕕᓂᐊᖅᑏᓪᓗ ᐊᕐᕕᓐᓂᐊᕆᐊᖅᑐᕆᐊᖃᖅᐸᑦᑐᒥᓃᑦ ᐅᐊᖕᓇᖅᐸᓯᒋᐊᕐᒧᓐ ᐃᖃᕐᕋᒥ, ᐊᕐᕕᖃᐅᕐᓂᖅᓴᒧᓐ. ᑕᐃᒪᐃᒻᒪᓐ, ᐅᑮᕕᐅᕙᑦᑐᒥᓂᖅ ᐅᖓᓯᓗᐊᕆᔭᐅᓕᕐᓂᕐᒪᓐ ᑮᓇᐅᔭᓕᐅᕈᑎᖃᐃᓐᓇᕈᒪᔪᓄᑦ. ᐅᖓᑎᒃᑲᓐᓂᖓᓄᓐ, ᐃᖅᑲᓇᐃᔭᖅᑏᑦ ᐅᒥᐊᕐᔪᐊᓂ ᓂᕿᑦᑕᖃᕆᐊᖃᕐᓂᖏᓐ ᐃᓱᒫᓘᑕᐅᖏᓐᓇᐸᓐᓂᕐᒪᓐ. ᐃᓄᐃᓐ ᑐᒃᑐᐃᓪᓗ ᐅᖓᓯᑦᑑᕙᓐᓂᕐᒪᑕ ᕿᑭᖅᑕᒥᒃ, ᓯᑯᓗ ᐃᓛᓐᓂ ᓇᓗᓇᖅᐸᓂᕐᒪᓐ ᕿᑭᖅᑕᖃᐅᓂᖓᒍᑦ, ᐱᔭᕆᐊᑐᕙᓐᓂᕐᒪᓐ ᑕᒪᐅᓈᕋᓱᐊᕆᐊᖅ ᐊᑯᓐᓂᖏᑎᒍᑦ ᓯᔾᔭᐃᑦ ᕿᑭᖅᑕᐃᓪᓗ ᐊᑐᕋᑦᓴᐅᙱᓯᐊᒻᒪᕆᓐᓂᕐᒪᓗᑭᐊᖅ. ᐃᖅᑲᓇᐃᔭᑏᑦ ᐅᒥᐊᕐᔪᐊᒥ ᑕᑎᖃᕐᓗᑎᒃ ᑭᓯᐊᓂᐅᕙᓐᓂᕐᒪᑕ ᐃᓄᓐᓂᒃ ᓄᑖᒥᓂᕐᒧᑦ ᓂᕿᒧᓐ, ᐅᑮᓂᐅᕙᑦᑐᒥᓃᑦ ᕿᑭᖅᑕᓂ ᐊᑯᓂᐅᕙᑦᑐᒥᓃᑦ ᐊᒃᓱᕈᕐᓇᖅᓱᑎᓪᓗ. ᐊᒥᓱᒐᓚᐃᓐ ᐅᒥᐊᖅᑐᖅᑏᑦ ᑐᖁᔪᒥᓃᑦ ᐃᒃᑭᓗᓐᓂᕐᒧᓐ ᑕᐃᑲᓂ ᓄᑖᒥᓂᖅᑐᕐᓇᓵᖅᑐᖃᓕᕋᐃᒻᒪᓐ ᓂᕿᒥᒃ.
ᐅᓪᓗᒥ ᐊᕐᕕᓂᐊᕐᓂᐅᕙᑦᑐᕕᓃᑦ ᑕᐃᒃᓱᒪᓂ ᐅᖅᓱᕆᐊᒥ ᓱᓕ ᑕᑯᒃᓴᐃᑦ. ᐃᓛᓐᓂᒃᑯᑦ, ᑎᓂᙵᓕᕋᐃᒻᒪᓐ ᐅᖅᓱᐊᑎᓪᓗᒍ, ᑕᑯᔭᒃᓴᖅ ᐅᒦᔭᕈᑎᒥᓂᖅ ᐅᐊᕐᕋᐃ ᑖᕝ (Orray Taft) ᐊᕐᕕᓂᐊᖅᑎᓄᑦ ᐅᒥᐊᕐᔪᐊᒥᓂᖅ ᑭᕕᓚᐅᖅᑐᒥᓂᖅ 1873–ᖑᑎᓪᓗᒍ. ᐃᓗᕕᖏᓐ ᐅᒥᐊᖅᑐᖅᑎᒥᓃᑦ, ᓯᑕᒪᓐ ᑖᒃᓱᒪ ᐅᒥᐊᕐᔪᐊᒧᑦ ᐃᖅᑲᓇᐃᔭᖅᑎᒥᓃᑦ, ᐅᐸᒐᑦᓴᐃᑦ ᐅᖅᓱᕆᐊᒥ ᐊᒪᓗ ᑐᖁᕕᐅᓚᐅᖅᑐᒥᓂᕐᒥ ᕿᑭᖅᑕᒥ. ᓄᓇᖃᕐᕕᕕᓃᑦ ᓱᓕ ᑕᐃᒪᐃᓕᖓᔪᓐ, ᓲᕐᓗ ᑕᐃᓐᓇ ᐅᔭᕋᕐᓂᒃ ᑐᙵᕕᓕᐊᕆᓯᒪᔪᑦ ᑖᒃᓱᒪ ᐅᒥᐊᕐᔪᐊᑉ ᐃᓄᖏᑕ ᓴᓇᓚᐅᖅᑕᒥᓂᖓ 1864–ᖑᑎᓪᓗᒍ, ᑳᐱᑕᐃ ᔪᐊᔾ ᐹᑯ (George J. Parker)
ᐄᐴᑉ ᓇᐃᓈᖅᓯᒪᑎᓪᓗᒋᑦ ᐅᖃᐅᓯᕆᓯᒪᔭᖏᓐ ᖃᓄᐃᓐᓂᐅᕙᑦᑐᒥᓃᑦ ᐅᖅᓱᕆᐊᒥ ᐃᓄᐃᓴᑦᑐᓄᑦ ᐅᖃᐅᓯᕐᓄᑦ:
ᕿᑭᖅᑕᖅ ᖃᐅᔨᒪᔭᐅᔾᔪᑎᒋᔭᖓ ᖃᖏᖅᓱᖅ ᑕᑯᕕᒃᓴᐅᖃᑦᑕᖅᓯᒪᔪᖅ ᐅᒦᔭᕐᕈᑎᕕᓂᕐᓂᒃ, ᑖᒃᑯᑑᓪᓗᑎᒃ ᐃᓗᕕᖅᓯᐅᐸᓐᓂᕕᓃᑦ, ᐱᕐᓕᖅᑐᑦ, ᐃᒻᒪᖄᓗ ᐃᓄᐊᕐᓂᖅ. ᑕᑯᔭᐅᖃᓯᐅᑎᓯᒪᒻᒥᔪᖅᑕᐅᖅ ᐆᒻᒪᕆᑦᑐᒥᒃ ᐅᒥᐊᕐᔪᐊᕐᒥᐅᑕᐅᕙᓐᓂᒥᓂᖅ, ᑖᓂᓯᖃᑦᑕᖅᑐᑦᕕᓃᑦ ᑐᙵᕕᓕᐊᕆᓯᒪᔪᒥ ᖃᐃᖅᑐᒥ, ᓂᔾᔭᐅᓯᔭᖅᑐᑦ, ᑯᒃᑭᑕᐹᖅᑐᑦ ᑕᑯᒃᓴᐅᑎᒃᓯᔪᓪᓗ ᐱᙳᐊᖅᓱᑎᒃ ᑕᕐᕆᔭᓕᐅᕐᕕᐅᕙᓐᓂᖅᓱᓂᓗ ᑕᕐᕆᔭᕐᕕᒃ ᓴᓇᔭᐅᓯᒪᔪᖅ ᐅᑭᐅᖅᑕᖅᑑᑉ ᐅᔭᕋᖏᓐᓄᓐ. (Eber 1989: 129)
ᐅᖅᓱᕆᐊᖅ ᓱᓕ ᐱᕐᔪᐊᖑᑎᑕᖅ ᐃᓄᓐᓄᓐ. ᐃᓄᐃᑦ ᑕᐃᑯᙵᖃᐃᒐᒥᒃ ᐹᕐᖑᖅᐸᑦᑐᑦ ᐅᒥᐊᒥᓐᓂᒃ ᓂᐅᒐᒥᒃ. ᖃᓄᐃᑦᑐᖃᕈᓐᓇᖅᑐᖅ ᐃᓄᓐᓂᒃ ᑕᒪᑐᒥᖓ ᐱᐅᓯᐅᕙᑦᑐᒥᓂᕐᒥᒃ ᐊᑐᖅᑐᖃᙱᒃᑯᓂ ᐊᕐᕌᒍᒥ ᐅᐸᓚᐅᖅᑕᒥᓂᕆᓗᒍ. ᑕᕝᕙ ᓵᓕ ᑖᑎᐅᑉ ᐅᖃᐅᓯᖏᑦ, ᑲᖏᖅᖠᓂᕐᒥᐅᑉ, ᑕᒪᑐᒪ ᒥᒃᓵᓄᖅ ᐅᓂᒃᑳᒥᓂᖓ ᐄᐳᒧᑦ:
ᐋᕼᐊᓘᓇ, ᑕᐃᒫᒃ ᐃᒃᐱᓐᓂᐊᕙᔪᔪᖓ ᓇᒻᒥᓂᖅ [ᑲᑉᐱᐊᒋᓪᓗᒍ ᕿᑭᖅᑕᖅ]!ᐹᕐᖑᕆᐊᖃᕐᓂᕋᐃᕙᔪᒻᒪᑕ ᓄᓈᕐᓗᓂ. ᓂᐅᔪᖃᖅᐸᑦ ᐹᕐᖑᖏᓪᓗᓂ, ᐊᕐᕌᒍᓪᓗᖅ ᐃᓱᓕᑉᐸᑦ ᐅᓪᓗᖅ ᑕᐃᓐᓇ ᓄᓈᕐᕕᒥᓂᖓ, ᑐᖁᕙᑦᑐᒥᓂᖅ. (Eber 130)
ᕿᒥᕐᕈᒍᒥᓇᖅᑐᖅ ᖃᕆᑕᐅᔭᕐᒥ: