ᐅᕙᓃᑦᑐᑎᑦ : ᐊᖏᕐᕋᖅ » ᐃᐅᕋ ᐅᒥᐊᕐᔪᐊᖅ

ᐃᐅᕋ ᐅᒥᐊᕐᔪᐊᖅ

ᐊᕐᓇᐃᑦ ᐊᓐᓄᕌᑦᑎᐊᖅᓯᒪᔪᑦ ᐅᒥᐊᕐᔪᐊᕋᓛᑉ ᐄᕋ ᐃᓗᐊᓂ, ᕼᐊᑦ5 146 Ko ᐊᕐᓇᐃᑦ ᐊᓐᓄᕌᑦᑎᐊᖅᓯᒪᔪᑦ ᐅᒥᐊᕐᔪᐊᕋᓛᑉ ᐄᕋ ᐃᓗᐊᓂ, ᕼᐊᑦ5

ᐊᕐᕕᓂᐊᖅᑏᑦ ᐅᒥᐊᕐᔪᐊᖓ ᐃᐅᕋ, ᑎᖏᕐᕋᐅᑕᓕᒃ, ᓴᓇᔭᒥᓂᖅ 1847-ᒥ ᐹᓯᑕᓐ, ᒫᔅᓲᓯᐊᑦᓯᒥ, ᓴᓇᔭᒥᓂᐅᓪᓗᓂ ᑖᓚᔅ ᓘᔅ ᐊᒻᒪᓗ ᑲᑉᐸᓂᖓᓄᑦ. ᐊᒥᓱᒐᓚᐃᑦ ᖃᐅᔨᒪᔭᐅᑦᓯᐊᖅᑐᑦ ᑳᐱᑕᐃᑦ ᐊᐅᓚᑦᓯᕙᑦᑐᒥᓃᑦ ᐃᐅᕋᒥᒃ ᓇᓪᓕᑭᑕᖅᐸᒃᓱᑎᒃ ᐅᑭᐅᖅᑕᖅᑐᒧᑦ ᐊᖑᓇᓱᐊᕆᐊᖅᑐᖅᓱᑎᒃ, ᐃᓚᒋᔭᐅᓪᓗᑎᒃ ᔪᐊᔾ ᑕᐃᓴᓐ (ᓯᕗᓪᓕᖅᐸᐅᖃᓯᐅᑎᔪᒥᓂᖅ ᒥᐊᓕᒐᒦᙶᖅᓯᒪᓪᓗᓂ ᑕᕆᐅᒃᑯᑦ ᐅᒥᐊᖅᑐᖅᑎ ᐅᑮᓪᓗᓂ ᑎᓄᔾᔨᕕᒻᒥ 1851–ᖑᑎᓪᓗᒍ), ᔭᐃᒻᔅ ᒪᓐᕖ ᐸᑎᓐᑕᓐ, ᔮᓐ O. ᓯᐸᐃᓱ ᐊᒻᒪᓗ ᑭᖑᓪᓕᖅᐸᐅᓪᓗᓂ ᔪᐊᔾ ᑰᒧ. ᑭᖑᓂᖓᒍᑦ ᐃᐅᕋᐅᑉ ᐅᑭᐅᕋᓴᓐᓂᒃ ᐅᑭᐅᖅᑕᖅᑐᒧᑦ ᐱᓕᕆᓂᖓᑕ, ᒪᓐᔪ (F.N. Monjo), ᓂᐅ ᔪᐊᒃᒥ ᒥᖅᑯᓕᓐᓂᒃ ᐱᓕᕆᕕᖁᑎᒋᔭᐅᔪᖅ, ᓂᐅᕕᐊᒥᓂᖓ ᐅᒦᔭᕈᑎᒥᓂᐅᓪᓗᓂᓗ ᓴᓂᐊᓂ ᒥᑯᐃᓚᓐ (Miquelon) ᕿᑭᖅᑕᖏᑕ ᔪᓚᐃ 27, 1906–ᖑᑎᓪᓗᒍ, ᑳᐱᑕᐃ ᔪᐊᔾ ᑰᒧ ᐊᖁᑕᖓᓂ.

ᐊᒥᓱᓄᑦ ᐃᓱᒪᒋᔭᐅᓯᒪᔪᖅ, ᐃᐅᕋ ᓱᓕ ᖃᐅᔨᒪᔭᐅᑦᓯᐊᖅᓱᓂ ᐊᕐᕕᓂᐊᖅᑎᓄᑦ ᐅᒥᐊᕐᔪᐊᒥᓂᖅ ᑲᓇᑕᒥ ᐅᑭᐅᖅᑕᖅᑐᒥ ᐅᖃᐅᓯᐅᓯᒪᔪᓂ ᐊᑐᖅᑕᐅᓯᒪᔪᓂ.

ᑖᓐᓇ ᐅᒥᐊᕐᔪᐊᖅ ᖁᐊᕐᒪᓐ ᑲᖏᖅᓱᐊᓘᑉ ᓯᑯᖏᓐᓂ 1867–ᖑᑎᓪᓗᒍ, ᔪᐊᔾ ᑕᐃᓴᓐ ᐱᖃᑎᑖᖅᑐᒥᓂᖅ ᓵᕈᔅ ᕗᕋᓐᓯᔅ ᕼᐋᓪᒥᒃ, ᐃᖏᕐᕋᓚᐅᖅᑐᒥᓂᖅ ᐃᑭᒪᓪᓗᓂ ᒪᓐᑎᓯᐊᓗ (Monticello) ᐅᒥᐊᕐᔪᐊᒥ, ᐊᔪᖅᓯᐅᖅᑲᓚᐅᖅᑐᒥᓂᖅᑕᐅᖅ ᓯᑯᒧᑦ ᐅᑭᐅᓕᒫᖅ.

ᐊᒥᐊᓕᑲᒥᐅᑦ ᐊᖅᕕᒐᓱᐊᕈᑎᖓ ᐅᒥᐊᕐᔪᐊᖅ ᐄᕋ ᐅᑭᐊᓪᓕᔪᖅ ᕼᐊȊ 112 Ko ᐊᒥᐊᓕᑲᒥᐅᑦ ᐊᖅᕕᒐᓱᐊᕈᑎᖓ ᐅᒥᐊᕐᔪᐊᖅ ᐄᕋ ᐅᑭᐊᓪᓕᔪᖅ ᕼᐊȊ

ᐊᕐᕌᒍᒐᓚᐃᑦ ᑭᖑᓂᖓᒍᑦ, ᑳᐱᑕᐃ ᔮᓐ O. ᓯᐸᐃᓱ ᓴᓇᔪᒥᓂᖅ ᐊᕐᕕᓕᕆᕕᒻᒥᒃ ᖃᐅᔨᒪᔭᐅᓪᓗᓂ ᓯᐸᐃᓱ ᑐᓚᑦᑕᕕᒻᒥᒃ ᐃᖃᖅᑎᓕᒃ ᕿᑭᖅᑕᓂ, ᖃᓂᑦᑐᖅ ᕿᑭᖅᑕᐸᐅᔭᒧᑦ, ᐅᖓᓯᓐᓂᓕᒃ 80 ᑭᓛᒥᑐᓂᒃ ᐅᐊᖕᓇᖓᓂᒃ ᓚᐃᒃ ᕼᐋᐳ ᑕᐃᔭᐅᕙᓕᖅᑐᖅ ᐅᓪᓗᒥ ᑭᒻᒥᕈᒻᒥᒃ. ᓯᐸᐃᓲᑉ ᐊᒃᓯᖅᑕᒥᓂᖓ ᐊᕐᕕᓕᕆᕕᒃ ᐊᑯᓕᐊᕐᒥᒃ ᐃᓄᒃᑎᑐᑦ ᐅᒥᐊᕐᔪᐊᒥ ᑎᑎᕋᕐᕕᒋᕙᑦᑕᒥᓂᖏᓐᓂ ᖃᐅᑕᒫᑦ) ᐊᒥᓱᓄᑦ ᐊᕐᕕᓂᐊᖅᑏᑦ ᐅᒥᐊᕐᔪᐊᖏᓐᓄᑦ ᐊᑐᖅᑕᐅᕙᑦᑐᒥᓂᖅ ᑖᓐᓇ ᐊᕐᕕᓕᕆᕕᒃ ᐊᑯᓐᓂᖏᓐᓂ 1877 ᐊᒻᒪᓗ 1890, ᐱᓗᐊᖅᑐᒥ, ᑖᒃᑯᓅᖓ ᐃᐅᕋᒧᑦ ᓇᐃᓪᒧᓪᓗ. 1879–ᖑᑎᓪᓗᒍ, ᓯᐸᐃᓱ ᐃᑳᖅᑎᑦᓯᓚᐅᖅᑐᒥᓂᖅ ᒪᕐᕉᓐᓂᒃ ᐅᒥᐊᕐᓂᒃ ᐊᕐᕕᓂᐊᖅᑎᓄᑦ ᑎᓄᔾᔨᕕᒻᒥ ᓯᐸᐃᓱ ᑐᓚᑦᑕᕐᕕᒻᒧᑦ, ᐊᕕᓕᕆᕕᒻᒧᑦ ᕿᒪᑦᓱᒋᑦ ᐅᑮᓂᐊᕐᒪᑕ ᑕᐃᑲᓂ ᐅᐱᕐᖓᑦᓵᕈᖅᐸᑦ ᐊᕐᕕᓐᓂᐊᕈᒪᒧᑦ ᓯᑯᖃᕋᓗᐊᖅᑎᓪᓗᒍ. ᔮᓐ ᐴᓪ, ᖃᐅᔨᒪᔭᐅᒻᒥᔪᑦᑕᐅᖅ ᔮᓂᕘ ᓰᒧᐊᕐᓲᒥᒃ (Johnnybo Chimoakjo, Shi-mer-ar-chu) ᐅᕝᕙᓘᓐᓃᑦ ᐃᑲᔪᖅᑎᒥᒃ, ᕿᑭᖅᑕᒥ ᓄᓇᖃᖅᑳᖅᑐᒥᓂᖅ, ᑲᒪᔨᒥᓂᖅ ᐊᕐᕕᓕᕆᕕᒻᒥᒃ. ᐅᐱᕐᖓᑦᓵᕈᕐᒪᓐ, ᐊᖑᓇᓱᐊᖅᑐᑦ ᐱᖓᓱᓂᒃ ᐊᕐᕕᑦᑐᒥᓃᑦ. ᓯᐸᐃᓱ ᐊᒻᒪᓗ ᐃᐅᕋ ᐃᖃᖅᑎᓕᓕᐊᕆᐊᕐᓂᖏᑦᑐᑦ ᐊᐅᒡᒍᓯᐅᑉ ᓄᙳᐊᓄᓄᑦ. ᓯᐸᐃᓱ ᑎᑭᑦᑐᒥᓂᖅ ᖃᐅᔨᒐᒥ ᑳᐱᑕᐃᖏᑦ ᐋᐱ ᐳᕌᑦᕗᐊᑦ (Abbie Bradford) ᔪᐊᔾ ᒥᐊᓕᓗ( George and Mary, ᒪᕐᕉᒃ ᑖᒃᑯᐊ ᐅᒥᐊᕆᔮᒃ ᐊᕐᕕᓂᐊᖅᑎᖏᑦ ᐱᓯᑕᐅᓕᐅᑎᕙᑦᑐᒥᓃᑦ ᓂᐅ ᐱᐊᑦᕗᐊᑦᒦᙶᖅᓯᒪᔫᒃ (New Bedford), ᓯᓚᐃᕐᕆᐊᕆᓪᓗᓂᐅᒃ ᔮᓂᕘ ᐅᖃᐅᔾᔭᒥᓂᕆᓪᓗᒍ ᐃᐅᕋ ᐊᕐᕕᓂᐊᖅᑎᓄᑦ ᐅᒥᐊᖅ ᐅᑎᖅᑐᒥᓂᐅᒋᐊᖓᓂᒃ ᓂᐅ ᓚᓐᑕᓐᒧᑦ (New London) ᐊᕐᕕᒥᓂᕐᓂᓪᓗ ᐱᖓᓱᓂᒃ ᐊᐃᑦᓯᓛᕐᓂᐊᕈᓐᓃᕐᓂᕋᖅᓱᒍ. ᕿᐱᓗᒐᓗᐊᖅᓱᓂ, ᔮᓂᕘ ᐅᓯᓕᖅᑐᖅᑎᓕᖅᑕᒥᓂᖏᑦ ᐊᕐᕕᒥᓂᕐᓂᒃ. ᐃᖅᑲᖅᑐᐃᕕᑎᒍᑦ ᑲᒪᔪᖃᓕᖅᑐᒥᓂᖅ ᓂᐅ ᐱᐊᑦᕗᐊᑦᒥ, ᔮᓂᕘᓗ ᐃᖅᑲᖅᑐᐃᕕᒻᒥ ᐅᓂᒃᑳᖅᑐᒥᓂ ᓯᐸᐃᓱ ᐅᖃᓕᒪᖁᓐᓂᕐᒪᐅᒃ. ᐅᓂᒃᑳᖓ ᓱᓕᔪᕆᔭᐅᓐᓂᕐᒪᓐ, ᓯᐸᐃᓱᓗ ᓵᓚᖃᖅᑐᒥᓂᐅᓪᓗᓂ ᐃᖅᑲᖅᑐᖅᑕᐅᒍᑕᐅᔪᒥᒃ.

ᑳᐱᑕᐃ ᔪᐊᔾ ᑰᒧ ᐃᐅᕋᒥᒃ ᖁᓚᕐᓇᖏᑦᑐᒥᒃ ᖃᐅᔨᒪᔭᐅᑦᓯᐊᓕᖅᑎᒃᓯᔪᒥᓂᖅ. ᐊᖓᔪᖅᑳᖑᓂᕐᒥᒃ ᐃᓕᓐᓂᐊᖅᑳᖅᑐᒥᓂᖅ ᑳᐱᑕᐃ ᓯᐸᐃᓲᑉ ᐊᐅᓚᑕᖓᓂ. ᑰᒧ ᐊᓱᐃᓪᓛᒃ ᖃᐅᔨᒪᓕᖅᑐᒥᓂᖅ ᑎᓄᔾᔨᕕᒻᒥᒃ ᑲᖏᖅᓱᐊᓗᒻᒥᓪᓗ ᐃᑭᒪᓪᓗᓂ ᓇᐃᓪᒥ ᐃᐅᕋᒥᓪᓗ. ᐊᒥᓲᓗᐊᙱᑦᑐᑦ ᐊᕐᕌᒍᐃᑦ ᑭᖑᓂᖓᒍᑦ ᖃᖏᖅᓱᐊᓗᒻᒥ, ᐃᐅᕋᓗ ᖃᐅᔨᓴᕐᕕᒋᕙᓕᕐᓂᖅᓱᓂᐅᒃ ᑰᒨᑉ, ᑳᐱᑕᐃᖑᓕᖅᓱᓂ. ᐊᕐᕕᓐᓂᐊᑐᐃᓐᓇᕋᓂ ᐃᓄᓐᓂᓪᓗ ᐱᓕᕆᖃᑎᖃᑐᐃᓐᓇᕋᓂ, ᑰᒧ ᐅᑮᓂᕐᒥᓂ ᐃᓕᓐᓂᐊᐸᑦᑐᒥᓂᖅ ᐃᓄᓐᓂᒃ ᐱᖃᑎᒥᓂᒃ ᐱᐅᓯᖏᓐᓂᒃ ᐱᖅᑯᓯᖏᓐᓂᓪᓗ ᐃᓕᓐᓂᐊᕈᒪᓂᖅᓴᐅᓂᕐᒧᓪᓗ ᐊᔾᔨᓕᐅᕆᓂᕐᒥᒃ. ᓯᑳᑦᓯᒥᐅᑉ ᑳᐱᑕᐃ ᔭᐃᒻᔅ ᒧᑦᔅ ᑕᐃᒪᐃᓐᓂᕐᒪᓐ, ᔪᐊᔾ ᑰᒧ ᐱᓕᕆᖃᑎᖃᖅᐸᑦᑐᒥᓂᖅ ᐱᐅᓯᖅᓯᐅᕆᔨᒥᒃ ᕗᕌᓐᔅ ᐳᐊᔅᒥᒃ, ᑕᑯᔭᒐᖃᕐᕕᖓᓂ ᐊᑐᖅᑕᐅᖃᑦᑕᓚᐅᖅᑐᒥᓂᕐᓂᒃ ᐱᓕᕆᔨᐅᕕᒻᒥᓄᑦ ᓂᐅ ᔪᐊᒃᒥ, ᐃᓄᐃᑦ ᐱᖅᑯᓯᖏᑕ ᒥᒃᓵᓄᑦ.

ᐃᐅᕋ, ᔪᐊᔾ ᑰᒨᑉ ᐊᐅᓚᒃᓯᔨᐅᕕᒥᓂᖓ, ᐃᓚᒋᔭᐅᖃᓯᐅᑎᒻᒥᔪᖅᑕᐅᖅ ᑲᓇᑕᒥ ᐊᑐᖅᑕᐅᕙᒃᑐᒥᓂᕐᓄᑦ ᓯᕗᓪᓕᖅᐸᐅᓪᓗᓂ ᒥᐊᓕᒐᒥᐅᓄᑦ ᐊᕐᕕᓂᐊᖅᑎᓄᑦ ᐅᒥᐊᕐᔪᐊᒋᐊᖓᒥᓂᖅ ᐊᑭᓖᖃᑦᑕᓂᐊᕐᓗᓂ ᓄᓇᖃᖅᑳᖅᑐᑦ ᓄᓇᒋᔭᐅᓂᖓᓄᑦ ᐊᑭᓕᖅᑐᕆᐊᓕᐅᑎᒋᐊᓂᓐᓂᒃ ᑲᓇᑕᐅᑉ ᒐᕙᒪᖓᓄᑦ ᒥᐊᔭ ᒨᑎ (J.D. Moodie ) ᐅᑭᐅᖅᑕᖅᑑᑉ ᐅᐊᓕᓂᖅᐸᓯᐊᓄᑦ ᐸᓖᓯᒃᑯᓐᓂᒃ, ᐃᑭᒪᓪᓗᓂ ᓂᐊᑉᑑᓐ (Neptune) ᐅᒥᐊᕐᔪᐊᒥ, ᐊᑭᓖᖁᔨᔪᒥᓂᖅ ᕘᓗᑕᓐᒥ (Fullerton) 1903–ᖑᑎᓪᓗᒍ 1904–ᒧᑦ. ᒨᑎ ᐃᓚᒋᔭᒥᓂᖅ ᑲᓇᑕᒥ ᓄᓇᓕᕆᔨᒃᑯᓐᓄᑦ ᓇᕈᓇᖅᑎ ᐊᐅᓚᑕᖓᓂ ᐃᓪᐳᑦ ᐲᑕ ᓘᒨᑉ. ᐃᓛᓂᐅᙱᑦᑐᒥᒃ, ᐊᐅᓚᒃᓯᔨ ᒨᑎᐅᑉ ᓄᓕᐊᖓ, ᔨᐅᕋᑏᓐ ᒨᑎ (Geraldine Moodie) ᐊᒻᒪᓗ ᐃᐅᓪᐳᑦ ᐱ. ᓘ (Albert P. Lowe,) ᐃᓄᐃᑦ ᐱᖅᑯᓯᕐᒥᓐᓂᒃ ᐃᓅᓯᖃᖅᑎᓪᓗᒋᑦ ᐊᔾᔨᓕᐅᕆᓂᕐᒥᒃ ᐃᓕᒃᑐᒥᓃᒃ, ᑕᐃᒪᐃᓐᓂᕐᒥᔪᖅ ᔪᐊᔾ ᑰᒧ, ᐅᑮᕙᒃᓱᓂ ᓴᓂᐊᓂ ᐃᐅᕋᐅᑉ ᐅᑮᕕᖓᑕ..

ᑰᒧ ᕿᒪᐃᔪᒥᓂᖅ ᓄᐊᓯᒪᔪᓂᒃ ᑕᐸᐃᕐᓇᖅᑐᓂᒃ ᐊᔾᔨᓂᒃ ᐊᔾᔨᓕᐅᖅᑕᐅᕙᑦᑐᒥᓃᑦ ᐃᑭᒪᔪᓄᑦ ᐅᒥᐊᕐᔪᐊᒥ ᓴᓂᐊᓂ ᐃᐅᕋᐅᑉ ᑐᑭᓯᒃᑲᓐᓂᕈᑎᒋᓯᒪᔭᑦᑎᓐᓂᒃ ᓇᓪᓕᖏᑦ ᐃᓄᐃᑦ ᐱᒻᒪᕆᐅᑎᓐᓂᕐᒪᖔᒋᑦ, ᐱᓗᐊᖅᑐᒥ ᓂᕕᓯᓈᖅ ᐊᒃᓯᖅᑕᒥᓂᓂ "ᓲᕙᓚᐃ–ᒥᒃ," ᐊᒻᒪᓗ ᐃᑉᐸᑐᖅ ᑕᔅᓯᐅᒃ (ᐅᕝᕙᓘᓐᓃᑦ ᑎᓯᐅᒃ), ᒥᐊᓕᒐᒥᐅᑦ ᐊᕐᕕᓂᐊᑎᖏᑕ ᐊᒃᓯᖅᑕᒥᓂᖓ "ᕼᐅᕆ–ᒥᒃ."

ᐊᔾᔩᑦ ᑕᑯᑦᓴᐅᑎᒃᓯᔪᑦ ᐊᕐᕕᑉᐸᒃᑐᒥᓂᕐᓂᒃ ᐊᕐᕕᑦᑐᒥᓂᐅᔪᖃᖅᑎᓐᓇᒍᓗ ᖃᓄᕐᓗ ᒪᒃᑕᖓᓂᒃ ᐅᖅᓱᖓᓂᓪᓗ ᐱᓚᒋᐊᖃᕐᓂᕐᒥᒃ ᐊᕐᕕᑦᑐᖃᖅᑐᒥᓂᐅᑎᓪᓗᒍ. ᑕᑯᑎᒃᓯᒻᒥᔪᑦᑕᐅᖅ ᐃᓅᓇᓱᐊᕈᓯᐅᕙᑦᑐᒥᓂᕐᒥᒃ ᖁᕕᐊᓲᑎᖃᖅᑐᓂᓪᓗ ᐅᒥᐊᕐᔪᐊᒦᑦᑐᓂᒃ ᐃᓄᐃᓪᓗ ᐃᒡᓗᕕᖓᕐᒦᑎᓪᓗᒋᑦ.

ᐃᓚᖏᑦ ᕿᒥᕐᕈᒍᒥᓇᖅᑐᑦ ᑕᑯᒋᐊᕐᕕᑦᓴᐃᑦ: